Sun, 11 Apr 2021

2 Heritage Houses ng mga kadalagahan ng Malolos, pinepreserba

Philippine Information Agency
23 Feb 2021, 22:38 GMT+10

LUNGSOD NG MALOLOS, Pebrero 23 (PIA) -- Dalawang heritage houses na tinirahan ng ilan sa mga Kadalagahan ng Malolos ang isinaisailalim sa preserbasyon, rehabilitasyon at restorasyon upang muling magamit sa ilalim ng konseptong "adaptive reuse".

Iyan ang ibinalita ni Mayor Gilbert Gatchalian sa pagdiriwang ng Ika-132 Taong Anibersaryo ng Pagsulat ni Jose Rizal sa mga Kadalagahan ng Malolos.

Tinatayang nasa 10 milyong piso ang ginugugol ng mamumuhunan na nakabili sa mga bahay na ipinipreserba.

Deklaradong isang heritage town ng National Historical Commission of the Philippines ang Kamistisuhan District, na kinatatayuan ang mga matatandang bahay na tinirahan ng angkan ng mga Kadalagahan ng Malolos.

Kaya't ipinagbabawal na gibain ang orihinal na istraktura ng mga natukoy na heritage houses kahit ito man ay mag-iba ng may-ari.

Ayon kay Women of Malolos Foundation Inc. President Vicente Enriquez, nabatid nilang ang dating tinirahan ni Leonor Reyes ay gagawing bed and breakfast facility habang isang restaurant naman ang balak sa katabi nitong naging bahay ni Alberta Santos Uitangcoy.

Kaugnay nito, sa programang pang-alaala na ginanap sa bagong City Hall ng Malolos, binigyang diin ni Enriquez na ang isa sa mga aral na iniwanan ng mga Kadalagahan ng Malolos ay matuto ang mga karaniwang mamamayan, lalo na ang kabataan, na unahing mahalin ang Dios at ang bayan na higit sa sarili.

Sinabi niyang nang magpetisyon ang may 21 Kadalagahan ng Malolos sa noo'y Spanish Governor General Valeriano Wayler, nasa 12 hanggang 28 anyos ang edad ng mga kadalagahan noong Disyembre 12, 1888.

Nilalaman ng nasabing petisyon ang kanilang paggigiit para sa kanilang karapatan na makapag-aral at makapagbukas ng paaralan. (CLJD/SFV-PIA 3)

More Calgary News

Access More

Sign up for Calgary News

a daily newsletter full of things to discuss over drinks.and the great thing is that it's on the house!